Füzuli azad edilmiş rayonlar arasında minaların sayına görə ən çox çirkləndirilmiş ərazidir

Füzuli azad edilmiş rayonlar arasında minaların sayına görə ən çox çirkləndirilmiş ərazidir

Şanlı Zəfər yürüşünün – 44 günlük Vətən müharibəsinin 21-ci günü – 2020-ci oktyabrın 17-si hərb tariximizə Füzuli şəhərinin və ətraf kəndlərin erməni işğalından azad edildiyi gün kimi yazıldı.

Müzəffər Ali Baş Komandan xalqa müraciətində əminliklə ifadə etdi ki, “biz Füzulini yenidən abadlaşdırıb, o kəndlərə qayıdacağıq. Biz öz torpaqlarımızı yenidən abad, müasir şəhərə çevirəcəyik. Bu torpaqlara yenidən həyat qayıdacaq”.

Füzuli uğrunda aparılmış savaş Azərbaycan dövlətinin və Ordusunun qüdrətini, xalqımızın yenilməzlik əzmini nümayiş etdirmişdir. O zaman bir sıra hərbi mütəxəssislər bu fikirdə idi ki, Füzulini işğaldan azad etmək üçün, bəlkə, aylarla vaxt lazım olacaq. Buna baxmayaq, Silahlı Qüvvələrimiz keçilməz hesab edilən istehkamları yararaq irəlilədi, şanlı Ordumuzun şücaəti qarşısında işğalçı qüvvələr son mərhələdə öz silahlarını yerə qoyub qaçdı. Düşmən və bütün dünya Azərbaycanın gücünü gördü.

Füzuli azad edilmiş rayonlar arasında minaların sayına görə ən çox çirkləndirilmiş ərazidir. İlkin hesablamalara görə, rayonda yüz mindən çox mina basdırılıb. Erməni hərbi birləşmələrinin təxribatı nəticəsində mülki əhaliyə, dövlət əmlakına, infrastruktur obyektlərinə, habelə sahibkarlıq subyektlərinə dəyən ziyanın qiymətləndirilməsi üçün bütün lazımi tədbirlər görülür. Dağıntı və ziyanın müəyyənləşdirilməsi üçün işçi qrupu tərəfindən qiymətləndirmə işləri aparılır. Yerli və xarici ekspertlərin iştirakı ilə görülən bu işlər nəticəsində erməni vandalizminə adekvat qiymət veriləcəkdir.

Füzulinin işğaldan azad olunmasından sonra dövlət başçısı İlham Əliyev dəfələrlə buraya səfər edib. 2021-ci il oktyabrın 26-da Azərbaycan və Türkiyə prezidentləri İlham Əliyev və Rəcəb Tayyib Ərdoğan Füzuli Beynəlxalq Hava Limanının açılış mərasimində iştirak ediblər. Cənab İlham Əliyev tərəfindən Füzuli Beynəlxalq Hava Limanı “Qarabağın hava qapısı” elan olunub. Bu, Qarabağın Azərbaycan iqtisadiyyatına inteqrasiyası baxımından olduqca mühüm əhəmiyyət daşıyır.

Qarabağın və Şərqi Zəngəzurun böyük iqtisadi potensialı var. Bu potensialın reallaşması və xüsusən də həmin ərazilərimizdə istehsal ediləcək məhsulların daxili bazara, o cümlədən xarici bazara ixrac edilməsi baxımından hava limanlarına ehtiyac var idi. Nəzərə alsaq ki, Şərqi Zəngəzur və Qarabağ iqtisadi rayonları potensial baxımından Azərbaycan iqtisadiyyatının 8 faizini formalaşdırmaq imkanına malikdir, qeyd edə bilərik ki, bərpa və yenidənqurma mərhələsindən sonra bu istiqamətdə işlər daha da sürətlənəcək.

Böyük Qayıdış Proqramının birinci mərhələsi çərçivəsində 2026-cı ilin sonunda 22 min insan Füzuli rayonunda yaşayacaq, bütövlükdə isə Qarabağ və Şərqi Zəngəzurda 140 min nəfər məskunlaşacaq.

Hazırda Prezident İlham Əliyevin rəhbərliyi ilə uğurla həyata keçirilən Böyük Qayıdış Proqramı dünyada ən genişmiqyaslı bərpa-yenidənqurma layihələrindən biri olaraq beynəlxalq aləmin diqqət mərkəzinə çevrilib. Azərbaycan xalqı əmindir ki, Qarabağ və Şərqi Zəngəzur bölgəsinin bütün rayonları, o cümlədən Füzuli rayonu tezliklə dünyada şöhrət qazanacaq.

Gülnaz Məmmədova – Zərdab Mərkəzləşdirilmiş Kitabxana Sisteminin əməkdaşı

Böyük Qayıdış Proqramı çərçivəsində Füzulidə də yenidənqurma işləri sürətlə davam etdirilir

2020-ci il sentyabrın 27-də başlanan 44 günlük Vətən müharibəsinin ən qanlı döyüşlərindən biri Füzuli şəhərinin azad olunması uğrunda gedib. Müzəffər Ali Baş Komandanın mükəmməl hərbi taktikası, qəhrəman ordumuzun şücaəti nəticəsində düşmənin onilliklərlə qurulan və “məğlubedilməzliyi” iddia olunan müdafiə səddi məhz bu döyüşlərdə yarıldı. Azərbaycan Ordusu düşmənin Füzulidə yüksək istehkam qurduğu mövqeləri darmadağın edərək peşəkarlığını nümayiş etdirdi.

Qarabağda başlamış genişmiqyaslı abadlıq-quruculuq işləri çərçivəsində Füzuli şəhərində ilk beynəlxalq hava limanı tikilmişdir. Dövlət başçısı Füzuli rayonunda 2026-cı ilin sonunadək 22 min insanın, bütövlükdə isə azad edilmiş ərazilərimizdə 140 min sakinin yaşayacağını söyləməklə, əslində, Azərbaycan dövlətinin qüdrətini bir daha ifadə etmiş oldu. Füzulinin, həmçinin digər tarixi torpaqlarımızın işğaldan azad olunmasında qətiyyət göstərən və buna nail olan cənab İlham Əliyev heç bir dövlətdən yardım almadan Qarabağ və Şərqi Zəngəzuru dünya miqyasında şəhərsalma prinsiplərinin yeni qaydalarına uyğun olaraq ən müasir yaşayış məskəninə çevirmək əzmindədir. Düşmənin xaraba qoyduğu bütün şəhər, qəsəbə və kəndlərimizin tezliklə nümunəvi abad yaşayış məskəninə çevrilməsi heç kimdə şübhə doğurmur.

Azərbaycan hökuməti Qarabağ və Şərqi Zəngəzur iqtisadi rayonlarında bərpa işlərinə bu ilin sonunadək 19 milyard manat vəsait ayırıb. Bu vəsait müxtəlif infrastrukturun bərpası, dağ-mədən sənayesinin inkişafı və digər sahələr üzrə layihələrə yönəldilib. İşğaldan azad edilmiş ərazilərdə şəhərlərin bərpası zamanı enerji səmərəliliyi məsələlərinə böyük diqqət yetirilir. Bu ərazilərdəki yeni yaşayış və inzibati binalar ən yüksək “yaşıl tikinti” standartlarına cavab verəcək. Günəş panelləri, intellektual enerji təchizatı sistemləri sıfırdan tətbiq olunacaq.

Azad edilmiş ərazilər müasir, dayanıqlı və sabit şəhər mühitinin yaradılması üçün böyük potensiala malikdir. Bu, Azərbaycanın COP29-da sədrliyinin çoxsahəli fəaliyyət planının dayanıqlı və sağlam şəhərlərin yaradılması üzrə məqsədlərinə uyğundur.

Prezident İlham Əliyev 2023-cü il oktyabrın 17-də Füzuli Şəhəri Günündə bu şəhərə köçmüş sakinlər və rayon ictimaiyyətinin nümayəndələri ilə görüşündə şəhidlərimizə dərin ehtiramını bir daha ifadə edib: “Bu gün bu bayram gününü qeyd edərkən, təbii ki, əziz şəhidlərimizin xatirəsinə hamımız bir daha öz dərin ehtiramımızı ifadə edirik. Mən iki gün əvvəl Xankəndinin əsas, mərkəzi meydanında xalqa müraciət edərkən demişdim ki, bu günə görə biz onlara borcluyuq. Bu, həqiqətdir”.

Hazırda işğaldan azad olunmuş ərazilərdə genişmiqyaslı bərpa-quruculuq işləri həyata keçirilir, insanlar doğma yurd-yuvalarına dönürlər. Azərbaycan dövlətinin heç bir kənar yardım olmadan, öz gücünə gördüyü işlərin miqyası həqiqətən də heyrət doğurmaya bilməz.

Böyük Qayıdış Proqramı çərçivəsində Füzulidə də yenidənqurma işləri sürətlə davam etdirilir. Şəhər ərazisində infrastruktur bərpa olunur, yaşayış binaları tikilir, kəndlər yenidən qurulur, həmçinin beynəlxalq hava limanı açılıb. Artıq Füzuli şəhər sakinlərinin bir qrupunun qayıdışı təmin edilib. Bundan sonra füzulililərin mərhələli şəkildə doğma yurda qayıdışı davam edəcək. Keçmiş köçkünlər böyük qürur və fəxarət hissi ilə şəhər günlərini dədə-baba torpaqlarında qeyd edəcəklər. Füzuli Şəhəri Günü onlara Müzəffər Ali Baş Komandan İlham Əliyev və rəşadətli Azərbaycan Ordusu tərəfindən verilən ən böyük hədiyyə olaraq qalacaq.

Rəmzi Şirinov-Zərdab rayonu, Dəli Quşçu kənd sakini fəal gənc