Azərbaycan dünyada gedən iqlim dəyişikliyi proseslərinə ən həssas şəkildə yanaşan azsaylı ölkələrdəndir

Azərbaycan dünyada gedən iqlim dəyişikliyi proseslərinə ən həssas şəkildə yanaşan azsaylı ölkələrdəndir

Hazırda Azərbaycan dünyanın ən böyük, həm də mahiyyətinə görə ən mühüm tədbirinə evsahibliyi edir. BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının Bakıda keçirilməsi qərarının verilməsindən sonra ötən bir il ərzində bu istiqamətdə mühüm tədbirlər görülüb, hazırlıqlar ən yüksək səviyyədə aparılıb. Və artıq bu möhtəşəm tədbir noyabrın 11-dən öz işinə başlayıb. Maraqlı məqamlardan biri budur ki, bu tədbirə hazırlıqlarla bağlı işlərə başlayandan Azərbaycana qarşı qarayaxma kampaniyalarına da start verilmişdi. Xüsusilə Qərb dairələrində hər zaman anti-Azərbaycan mövqeyi ilə seçilən qüvvələr, o cümlədən QHT-lər, müxtəlif lobbi dairələri və fəaliyyətini qeyri-obyektivlik və yalan üzərində qurmağa çalışan media orqanları, ayrı-ayrı siyasilər, bir gün belə ara vermədən, ölkəmizi müxtəlif absurd mövzularda ittiham edərək tədbiri boykot etməyə çağırırdı. Azərbaycan Prezidenti İlham Əliyev noyabrın 12-də Bakıda COP29-un Liderlər Sammitinin açılış mərasimindəki çıxışında həmin dairələrə mesaj göndərməyi də unutmadı: “Mənim sonuncu mesajım o dairələrədir ki, onlar demək olar, artıq bir ildir boykotu təşviq edirlər. Onlar əllərində olan bütün vasitələrdən istifadə edirlər ki, Bakıdakı COP29-a qarşı boykot kampaniyası həyata keçirilsin. Onlara pis xəbərim var: bizim 196 ölkədən 72 min qeydiyyata alınmış iştirakçımız var. Onların arasında 80 Prezident, Vitse-prezident və Baş nazir var. Beləliklə, dünya Bakıda toplaşıb və biz dünyaya deyirik ki, “Azərbaycana xoş gəlmisiniz!”.

Digər vacib məqam ondan ibarətdir ki, ölkəmiz hətta COP29 kimi nüfuzlu bir tədbiri keçirməsəydi belə, unudulmamalıdır ki, Azərbaycan yenə də dünyada gedən iqlim dəyişikliyi proseslərinə ən həssas şəkildə yanaşan azsaylı ölkələrdəndir. Çünki ölkəmiz qlobal ekoloji problemlərə şifahi çağırışlarla yox, əməli yanaşması ilə seçilir. Təsadüfi deyil ki, Azərbaycanın 2030-cu ilə qədər sosial-iqtisadi inkişafına dair 5 milli prioritetindən birinin “Təmiz ətraf mühit və yaşıl artım ölkəsi” kimi müəyyənləşdirildiyi rəsmi səviyyədə qəbul olunub. Həmin prioritetə uyğun olaraq ölkəmizdə artıq ətraf mühitin sağlamlaşdırılması, yaşıllıqların bərpası və artırılması, su ehtiyatlarından, həmçinin dayanıqlı enerji mənbələrindən səmərəli istifadənin gerçəkləşdirilməsi istiqamətində əməli işlər görülür. Azərbaycan 1990-cı illə (baza ili) müqayisədə 2030-cu ilə qədər istilik effekti yaradan qazların emissiyalarının 35 faiz, 2050-ci ilə qədər isə 40 faiz azaldılmasını qarşıya məqsəd qoyub. Bununla yanaşı, elektrik enerjisi istehsalının qoyuluş gücündə bərpaolunan enerji mənbələrinin payının 2030-cu ilə qədər 30 faizə çatdırılmasını hədəf kimi müəyyənləşdirib.

Babək Əliyev – Zərdab şəhər sakini, ağsaqqal

COP29 dünyanın yaşıl gündəliyinə mühüm töhfə oldu

BMT-nin Baş katibi Antonio Quterreş də COP29 Liderlər Sammitinin açılışında bu mövzuya töxunaraq bildirdi ki, iqtisadi zərurət hər yeni bərpa olunan enerji mənbələrinin tətbiqi, hər innovasiya və hər qiymət azalması ilə daha aydın və inandırıcı olur. Keçən il ilk dəfə olaraq elektrik şəbəkələrinə və bərpa olunan enerji mənbələrinə investisiyaların həcmi qalıq yanacağa çəkilən xərcləri üstələyib. Demək olar ki, hər yerdə günəş və külək enerjisi yeni və ən ucuz elektrik enerjisi mənbələrinə çevrilir. İnsanları iqlim böhranının dağıdıcı nəticələrindən qorumaq üçün daha çox iş görməyə çağıran Baş katib hər kəsi üç prioritetə diqqət yetirməyə çağırdı: Birincisi, qlobal temperatur artımını məhdudlaşdırmaq üçün emissiyalar təcili surətdə azaldılmalıdır ki, bunun üçün də emissiyaların hər il 9 faiz azaldılması vacibdir. 2030-cu ilə qədər emissiyalar 2019-cu ildəki səviyyə ilə müqayisədə 43 faiz azalmalıdır. Eyni zamanda, qlobal qalıq yanacaq istehsalı və istehlakını 30 faiz azaltmalı, zəruri investisiyaları cəlb etmək üçün milli enerji keçidi strategiyalarını və dayanıqlı inkişaf prioritetlərini iqlim fəaliyyətləri ilə uzlaşdırmalıdırlar. BMT-nin Baş katibi bütün ölkələrin bu işə öz töhfəsini verməyinə çağırış edərək, paralel olaraq da G20 ölkələrinin bu işə liderlik etməyini dilə gətirdi. Bunu da onunla əsaslandırdı ki, G20-yə daxil olan ölkələr ən böyük emitentlərdir və ən böyük imkanlara, eləcə də məsuliyyətə malikdirlər və inkişaf etmiş ölkələrin dəstəyi ilə inkişaf etməkdə olan iqtisadiyyatlara texnoloji nou-haularını birləşdirməlidirlər.Quterreş qarşıda duran öhdəliklərin real pula çevrilməsi zərurətini nəzərə alaraq, üçüncü prioritetin maliyyələşdirmə olduğunu vurğuladı: “COP29 iqlim maliyyəsi yolundakı divarları dağıtmalıdır. İnkişaf etməkdə olan ölkələr Bakını boş əllə tərk etməməlidirlər. İqlim maliyyələşdirməsi lazımdır, əks halda bəşəriyyət bunun əvəzini ödəyəcək. İqlim maliyyəsi xeyriyyəçilik deyil, bu bir investisiyadır, iqlim fəaliyyətləri seçim deyil, imperativdir”.

Vurğulamaq lazımdır ki, BMT Baş katibinin səsləndirdiyi prioritetlər Azərbaycanda son illərdə həyata keçirilən dövlət siyasətinin ana xəttini təşkil edir. Hamımıza məlumdur ki, son 30 ildə məlum münaqişə səbəbindən Azərbaycan ekoloji mühitinin mühüm bir hissəsi dağıdılmış vəziyyətdədir. Buna görə də həm də ekoloji çirklənməyə məruz qalan azsaylı ölkələrdəndir. 4 il bundan əvvəl torpaqlarımız işğaldan azad olunsa da, həmin ərazilərdə yayılmış mina terroru hələ də bu sistemi təhdid edir. Üstəlik işğal dövründə həmin ərazilərdə su mənbələrindən kortəbii istifadə, meşə və qiymətli ağac növlərinin kütləvi məhv edilməsi, fauna-flora disbalansının yaranması ölkəmizə milyardlarla dollar həcmində ekoloji ziyan vurub. Amma bütün bunlara baxmayaraq, ərazi bütövlüyümüzün təmin olunmasından sonra Azərbaycan Prezidenti tərəfindən bu bölgələrin dirçəldilməsi üçün çox mühüm və innovativ konsepsiyalar ortaya qoyulub. Yaşayış məntəqələrinin “ağıllı şəhər”, “ağıllı kənd” layihələri üzrə yenidən qurulması, təbiət ərazilərinin sürətli və ən yüksək səviyyədə bərpa olunması, eləcə də getdikcə artan enerji tələbatının daha çox “yaşıl enerji” mənbələrindən istifadə olunaraq təmin edilməsi qlobal iqlim dəyişikliyinə verilən ən böyük töhfədir. Sadalanan layihələr təkcə işğaldan azad edilmiş ərazilərdə deyil, ümumilikdə ölkənin digər regionlarında da tətbiq edilir. Ölkə başçısının Qarabağ və Şərqi Zəngəzurla bərabər, Naxçıvan Muxtar Respublikasını da “yaşıl enerji” zonası elan etməsi bunu bir daha təsdiq edir. Hazırda paytaxt Bakıda, eləcə də ölkənin digər regionlarında, həmçinin muxtar respublikada davam etdirilən “yaşıl enerji” layihələri Azərbaycanın qlobal ekoloji təhdidlərlə mübarizədə atdığı mühüm addımlardandır.

Gülnaz Məmmədova – Zərdab Mərkəzləşdirilmiş Kitabxana Sisteminin əməkdaşı

Azərbaycanı neft və qaz yataqlarına malik olmasına görə ittiham edənlər də fiaskoya uğradılar

Məlum olduğu kimi, uzun müddətdir müzakirə olunan BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası Bakıda işinə başladı. Ümumilikdə, COP29-da 196 ölkədən 72 min iştirakçı qeydiyyatdan keçib ki, onların da sırasında 80 prezident, vitse-prezident və Baş nazirlər var. Ümumiləşdirilmiş şəkildə ifadə etmək olar ki, COP29 tədbiri dünyanın yaşıl gündəliyinə mühüm töhfə, riyakar dairələrə isə böyük siyasi zərbə oldu.

Azərbaycan COP29 üçün ev sahibliyi hüququnu əldə etdikdən sonra antiAzərbaycan dairələrinin sistemli hücumlarına məruz qaldı: “Xüsusilə də Qərbdəki dairələr, QHT libasındakı qruplaşmalar, media quruluşları və ölkəmizdəki “beşinci kolon” Azərbaycana qarşı qarayaxma kampaniyasına başladılar. Onu da qeyd etmək yerinə düşər ki, “X” sosial şəbəkə seqmentində erməni lobbisinin təsiri altında olan Qərb siyasətçiləri belə bu kampaniyaya qoşuldular. Lakin hər zaman olduğu kimi bu kampaniyalar nəticəsiz qaldı və COP29 ən yüksək səviyyədə baş tutdu, dünyanın aparıcı ölkələrinin rəhbərləri Bakıda toplaşdı”.

Dünya ölkələrinin və beynəlxalq təşkilatların nümayəndələri birbaşa Bakıda Azərbaycanın yaşıl gündəliyi ilə tanış oldular: “Prezident İlham Əliyev BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının Liderlər Sammitinin açılış mərasimində çıxışında diqqətə çatıdırdı ki, Azərbaycanın bərpaolunan enerjidə texniki potensialı quruda 135 giqavat və dənizdə isə 157 giqavat təşkil edir. 2023-cü ildə BƏƏ-nin Masdar şirkəti 230 meqavatlıq Günəş enerji stansiyasının açılışını edib, Səudiyyə Ərəbistanının “Acwa Power” şirkəti isə hazırda 240 meqavatlıq külək enerjisi stansiyasını inşa etdirir. Həmçinin, bp ilə Cəbrayıl rayonunda 240 meqavatlıq Günəş enerjisi stansiyasının tikilməsi ilə bağlı saziş də imzalanacaq. Ümumilikdə, Azərbaycan 2030-cu ilə qədər təxminən altı giqavatlıq Günəş, külək və hidroenerji stansiyalarının tikilməsini planlaşdırır. Bütövlükdə isə Azərbaycanın təşəbbüsü ilə Xəzər dənizindən başlayaraq Qara dənizin dibi ilə çəkilən enerji kabeli ilə Avropaya yaşıl enerjini ixrac ediləcək ki, bu kabelin də texniki potensialı dörd giqavatdır”.

COP29-un təşkili və keçirilməsi antiAzərbaycan dairələrinə sarsıdıcı zərbə oldu və beynəlxalq ictimaiyyət rəsmi Bakının yaşıl gündəliyinin zənginliyinə şahidlik etdi. Eləcə də dünya ölkələri son bir il ərzində Azərbaycana qarşı aparılmış çirkin kampaniyanın da nə qədər əsassız olduğunu görmüş oldular. COP29-un ən yüksək səviyyədə təşkili ilə Azərbaycan bir daha sübut etdi ki, dünya ölkələri qlobal tədbirə ev sahibliyi seçimində səhvə yol verməyiblər. Bir sözlə, Azərbaycan növbəti dəfə ona göstərilən qlobal etimadı və etibarı doğrultmuş oldu.

Elyurə Məmmədova-Rayon mədəniyyət mərkəzinin direktoru