“Pulunu ver, pensiyanı al” – Bu tibb müəssisəsi “ödənişli kömək” təklif edir

Səhiyyə bizim üçün əziz, qiymətli bir sahədir və onun inkişafı üçün lazımi tədbirlər görüləcəkdir !
Heydər Əliyev

Ulu öndər bu sözləri dedi və son nəfəsinə qədər də lazım olan hər şeyi etdi.
Allah rəhmət eləsin!

Sevindirici haldır ki, ulu öndərimizin layiqli davamçısı – prezident İlham Əliyev özü də hər zaman təhsil və səhiyyə sahəsinə xüsusi diqqət ayırır, hər iki sahənin inkişafı üçün bütün səylərini əsirgəmir. Lakin, təəssüflər olsun ki, hər iki sahənin dövlətə, xalqa deyil, özünə – daha dəqiq desək, cibinə xidmət edən çalışanları bu uğurlu inkişafa qəsdən ləkə vurmaqda davam edirlər.

Vətəndaşlara qarşı nümayiş etdirdikləri kobud rəftarlar, hörmətsizliklər azmış kimi, üstəlik rüşvət və korrupsiya ilə məşğul olaraq, xalqın dövlət qurumlarına olan inamlarını, güvənclərini 0-a endirməyə çalışırlar.

Ən acınacaqlısı isə bu cür çalışanları hər şeyə rəğmən tabe olduqları qurum rəhbərlərinin dəstəkləməsidir. Dəstək göstərmək, şou-biznesdə olduğu kimi alqışlamaqdan ibarət deyil, rüşvət alan işçilərin bu cinayət əməllərinə göz yummaq, ört-basdır etmək özü də həmin şəxsin törətdiyi cinayəti bölüşməkdir.

Rüşvət — hər hansı bir vəzifəli şəxsə verilən pul və ya əşya şəklində maddi sərvətdir. Rüşvət korrupsiyanın əsasını təşkil edir. Rüşvətdə iştirak edən vasitəçi 3 ildən 5 ilədək azadlıqdan məhrum edilir.

Yəni, “DogruXeber.az” informasiya agentliyinə müraciət edən Samux rayon Qarayeri qəsəbə sakini Əjdər Məmmədovun həyat yoldaşı Gülxanım Məmmədovanın Zərifə Əliyeva adına Oftalmologiya Mərkəzində tibb bacısı işləyən Gülnar Həsənovaya verdiyi 1800 (min səkkiz yüz) manat pul da rüşvətdir və yuxarıda da qeyd etdiyimiz kimi, rüşvət cinayət əməli olduğu üçün, cinayət məcəlləsində bəlli bir cəzası var. Lakin, maraqlıdır ki, Azərbaycan Respublikasının Səhiyyə Nazirliyi Əjdər Məmmədovun sözügedən tibb işçisinə rüşvət verdiyini iddia etməsinə, əlimizdə buna dair səs yazıları, yazışmalar olmasına baxmayaraq, göndərdiyimiz rəsmi sorğulara, “araşdırdıq, qeyd etdiyiniz faktlar öz təsdiqini tapmadı”, “cavab”ını verir. İsrarla bizi gördüyümüzü, bildiyimizi “danmağa dəvət edir”.

Xatırlatmaq üçün bu barədəki ötən yazılarımızı aşağıdakı linkdə təqdim edirik:

Bu tibb müəssisəsində rüşvət faktı – VİDEO

Bu göz klinikasında rüşvəti yığanlar və mənimsəyənlər...

Görəsən, Səhiyyə Nazirliyi “fakt ” deyərkən, nəyi nəzərdə tutur?, nə istəyir?

Səs yazısı, yazışma və şikayətçi olduğu məsələni, şikayətçi tərəfin iştirakı, hətta ümumiyyətlə məlumatı olmadan araşdırma hansı formada aparılıb?

Deyəsən, tarix təkrarlanır…

Sabiq nazir Oktay Şirəliyevin də nazir olduğu zamanlarda səhiyyə sahəsindəki özbaşınalıq, kobudluq, rüşvət demək olar ki, bu həddə idi. Əlbəttə ki, bu gün Azərbaycan səhiyyəsinə rəhbərlik edən Teymur Musayev, o, zamanlar Oktay Şirəliyevin müavini olduğu üçün bütün məsələlərdən də yaxından məlumatlı olan bir şəxs idi.

Rüşvət alan… Səhv diaqnoz qoyan… Xəstə və yaxınları ilə “məhləuşağı” kimi davranan tibb işçiləri…

Fərq bundadır ki, o, zamanlar bütün tibb müəssisələri nazirliyin tabeliyində olduğu üçün hər yerdə bu “qaydalar” hökm sürürdü, bu gün isə Milli Onkologiya mərkəzi, Tədris Cərrahiyyə klinikası, Oftalmologiya Mərkəzi və nə yazıq ki, küllü miqdarda pulumuzu alan özəl klinikaların bir çoxu həmin,”ənənə”yə sadiqdirlər.

Qeyd edək ki, bu adları biz sözgəlişi çəkmədik !

Redaksiyamıza müraciət edən Ağcəbədi rayon Avşar kənd sakini Alimə Rəfiyevanın Tədris-cərrahiyyə klinikasında qızının və iki övladının QİÇS-Ə yoluxdurulması, şəhid xanımının Tibb universitetinin Onkologiya klinikasında ona qarşı kobud davranılması, Milli Onkologiya mərkəzində bir iynə üçün xəstə yaxınından 100 (yüz) manatdan çox pul tələb edilməsi, Əjdər Məmmədovun, eləcə də özümüzün akademik Zərifə Əliyeva adına Oftalmologiya Mərkəzində qarşılaşdığımız rüşvət tələbi barəsindəki məlumatları zaman-zaman izləyicilərimizə təqdim etmişik.

Qeyd: Yeri gəlmişkən, qarşıdakı günlərdə 19 yaşlı yeniyetmə qıza yanlış diaqnoz qoyub, onu və ailəsini psixoloji cəhətdən çökdurən Modern və Memorial hospital barəsindəki məlumatları təqdim edəcəyik.

Çox təəsüf, bu kimi məlumatlar o, qədər çoxdur ki, sadaladıqca mövzudan bir balaca uzaqlaşdıq.

Bu gün bu mövzuya təkrar qayıtmağa bizi vadar edən Əjdər Məmmədovun həyat yoldaşı Gülxanım Məmmədovaya, uşaq yaşlarından gözdən əlil olmasına baxmayaraq, “istəyirsən bir gözün ümumiyyətlə görməsin, pul verməsən xeyri yoxdur, pensiya vermirlər” deyə, ondan 1800 (min səkkiz yüz) manat rüşvət alınmasıdır.

Qeyd edək ki, bununla bağlı Əjdər Məmmədov redaksiyamıza mərkəzin işçisi Gülnar Həsənova ilə yazışması, xanımın səs yazısı, karta köçürülən məbləğin qəbzini təqdim edib və biz bütün bunlar barəsində aidiyyatı üzrə Səhiyyə Nazirliyinə iki dəfə rəsmi sorğu göndərmişik.

Əjdər Məmmədovun sözlərinə görə Gülnar Həsənova ona gah axundu, gah öz oğlunu, gah da şəhid ailələrini minnətçi salır. Şəhid qızı olduğunu deyən, “rüşvət alanlar qrupu”na qoşularkən şəhidini xatırlamayan Gülnar xanım, indi bu statusu “qalxan” kimi qarşısına tutub, şəhid ailələrini məsələyə qatıb.

“Rüşvət alanlar qrupu” deyərkən, onun aldığı məbləği bölüşdürdüyü digər şəxsləri nəzərdə tuturuq. Hansı ki, Əjdər Məmmədovun iddialarına görə, Gülnar xanım, “bunun 500 manatı baş həkimə çatacaq” deyə ipucu vermişdi. Amma, ipucu verməsə belə, hər kəsə məlumdur ki, sıradan bir tibb bacısı bu boyda məsuliyyətin altına tək girə bilməz. Görün işin harasıdır ki, xanım hətta rüşvət aldığı pasientlərə belə “iş birliyi” (maklerlik) təklif edərək, “Sən bizə pensiya üçün xəstələr gətir, hərəsindən 100 manat da sənə qalsın” deyir.

Baş həkimin, eləcə də sözügedən mərkəzin direktoru Elmar Qasımovun baş verənlərə biganə yanaşması artıq başadüşüləndir. Bəs, Səhiyyə Nazirliyinin faktları görməzdən gəlməsi bir yana, üstəlik ört-basdır etməyə çalışmasına nə ad vermək olar?

Mövzunu davam etdirəcəyik !

Redaksiyamız hər kəsin söz haqqını tanıyır.